海洋堂 Capsule Q - 十二支動物頭骨根付 (廣告貼)

好耐無去追扭旦幾時出,幾個月發佈既十二生肖骨骨系列, 係近排少有會一路留意住既旦旦

點知....出果個禮拜就撞正台灣旅行, 結果....俾多幾十 (以我所知, 最平三百二, 12件骨)

海洋堂唔玩動物一排, 忽然懶勁咁叫Capsule Q 作為旗號, 打做懶係高質系列

點解要講"懶係"呢? 因為玩開動物旦既朋友都會知道, 幾年前既奇譚旦, 或者再再幾年前既海洋堂旦,佢地當時既質素之高, 可以用"像真"黎形容

近兩年Capsule Q 既質素, 相比之下, 只可以叫做"Ok 啦"既啫, 最騎呢既係, 比例唔一致, 舊模放大, 但上色技術下滑, 相信如果你有儲開動物旦如我, 都不期然拎支純萬出黎, 遠望唔知邊個方向, 吹一口輕煙出黎唏噓一番

(喂, 講骨啦喂.....係既 係既)

既然講到咁屎, 有咩好期待啫咁?  嗱, 骨呢家野, 好多時都係同一套動物旦入面其中一兩個款色

例如, 出套水族館旦, 只會有一款係講骨骼; 或者近排既三角龍都係咁樣情況

所以, 如果成套都係骨既話, 係非常少有既

又另外, 人家放呢款官圖出黎喎, 期待下都應該啦

睇唔清楚? 再搵張大d 過你

係咪得得地先?

背負住Capsule Q "懶係"好野既傳統, 實物當然要俾玩家一定程度既驚喜啦, 好, 去片! (網上圖: http://d.hatena.ne.jp/Epikt/20131117)

   

喂, 白書書既?

喂, 牙喇無黑色漬既? 

喂, d牙一排唔係隻隻分明, 好似小吉依起棚牙果時咁一條直線過既? 

喂, 你唔係諗住過半年出套2.0呀?

"唔係喎, 樓主, 白色先係真骨既顏色黎喎, 黃色果d 係講緊係唔知放左响條街, 吹返三五七百年再出土先係咁既顏色喎; 既然係咁, 咁梗係無煙屎牙, 更加唔應該滲線啦"

Ok Ok, 係我要求高, 仲諗住用咩商品及說明條例, 告到佢甩褲....

查實套野一d 都唔屎, 白書書既骨, 唔係普通見開既扭旦軟膠料, 係實的的, 易脆那種; 比例亦洽到好處, 大概1:12左右

由於易脆關係, 買既時候記得睇清楚有角果批骨, 尤其是龍,啪斷角係普通既事

套野都幾好啦, 都仲突登開post 去柴台佢?  喂, 你睇人家NECA 下面套骨都係賣緊一舊水咋, 又硬淨上色又豐富, 仲係版權野, 呢套十二生肖玩緊四舊呀大佬

• カプセルQミュージアムより,ホネコレ！『十二支動物頭骨根付』の登場です！！
• 12体の干支を上巻・下巻で各6種ずつラインナップ！また,スペシャルアイテムとして来年の干支“午”の金色(上巻)・銀色(下巻)をご用意！
• こちらは上巻・下巻のノーマル12種類にスペシャルアイテム2種を含めた,全14種類スペシャルフルコンプセットです☆